Исроилни қўллаётган АҚШ Украинани ҳам қуруқ қолдирмади

12:39 / 04.11.2023     967

АҚШ Мудофаа вазирлиги Украинага умумий қиймати 425 миллион доллар бўлган навбатдаги ҳарбий ёрдам пакетини тақдим этади. Бу ҳақда Пентагон сайтида маълум қилинди.

Бу Украинанинг жанг майдонидаги зудлик билан эҳтиёжларини қондириш учун 125 миллион долларгача бўлган Пентагон захираларини, шунингдек, Украинанинг ҳаво мудофаасини узоқ муддатга мустаҳкамлаш учун 300 миллион долларлик Украина хавфсизлигига кўмаклашиш ташаббуси (USAI) маблағларини ўз ичига олади.

Янги пакетга  NASAMS зенит-ракета тизимлари ва HIMARS  кўп учирувчи ракета тизимлари учун қўшимча ўқ-дорилар, 105 мм ва 155 мм артиллерия снарядлари, TOW танкга қарши ракеталари, Claymore пиёдаларга қарши миналар, 3 миллиондан ортиқ ўқ-дорилар, гранаталар, шунингдек, оғир техникани ташиш учун 12 та юк машинаси киради.

Бундан ташқари, Украина учувчисиз учиш аппаратларга қарши курашиш учун қўшимча лазер ёрдамида бошқариладиган ўқ-дориларни олади. Пентагон АҚШнинг Украинага ёрдамини “ақлли сармоя” деб атаган.

“Украина хавфсизлигига ёрдам бериш бизнинг миллий хавфсизлигимиз учун оқилона сармоядир. Бу бизнинг мудофаа саноат базамизни мустаҳкамлаш ва Америка халқи учун юқори малакали иш ўринларини яратиш билан бирга, минтақада каттароқ можароларнинг олдини олишга ёрдам беради ва бошқа жойларда потенциал тажовузнинг олдини олади", дейилади Пентагон баёнотида.Маълумотларга кўра, АҚШ Президент Жо Байден бошқаруви бошланганидан бери Украинага хавфсизликни таъминлаш учун 44,8 миллиард доллардан кўпроқ ёрдам кўрсатди. Шу жумладан, 2022 йил 24 февралда Россиянинг кенг кўламли бостириб кириши бошланганидан бери 44,2 миллиард доллар ёрдам берилган.

Эслатиб ўтамиз, аввалроқ АҚШ Конгресси Вакиллар палатаси республикачиларнинг Исроилга 14,3 миллиард долларлик ёрдам кўрсатиш режасини маъқуллаганди. Унда Украинага ёрдам кўрсатилмаганди.

Шунингдек, “Politico” нашри Украина расмийлари Россия яқин келажакда жанг майдонида ҳеч қандай муваффақиятга эриша олмаслиги учун Қўшма Штатлардан кўпроқ қурол етказиб беришни “ёлвораётганини” ёзганди.