Наманганда “Қора дори-2020” тадбири натижаси

21:12 / 10.06.2020     1882

Наманган вилояти ИИБ ходимлари томонидан гиёҳвандлик воситаларини аҳоли орасида тарқалиши, сақланиши ва савдосига чек қўйиш мақсадида ҳар куни барча ҳудудларда назорат тадбирлари ўтказиб борилмоқда.

Жорий йилнинг 9 июнь куни Тўрақўрғон туман ИИБ ходимлари томонидан олиб борилаётган тадбир давомида туманда яшовчи фуқаро яшаш уйидаги ҳожатхонасининг том қисмида қуритиш учун 12 туп  кўкимтир рангли, ўткир ҳидли чала қуриган ўсимликларни сақлаб келаётганлиги аниқланган.

Наманган шаҳар ИИО ФМБ ЭКБнинг хулосасига кўра, ушбу ўсимликларнинг соф оғирлиги 40,13 грамм бўлиб “Кўкнор сомони” гиёҳвандлик моддаси эканлиги кўрсатилган.

Шу куни тумандаги яна бир хонадонда томорқасидаги гилос дарахти шохига нашасимон ўсимликнинг синдирилган шохини қуритиш учун илиб қўйган шахс аниқланган.

Наманган шаҳар ИИО ФМБ ЭКБнинг хулосасига кўра, ушбу нашасимон ўсимликни синдирилган шохининг соф оғирлиги 27,22 грамм бўлган “Каннабис” гиёҳвандлик моддаси эканлиги кўрсатилган.

Ҳозирда икки ҳолат юзасидан терговга қадар суриштирув ишлари олиб борилмоқда.